Патефон күйтабақтарынан бастап бұлтты сақтау жүйесіне дейін – «Тарихтың дауысты шежіресі» көрмесіне келген қонақтар дыбыс тасымалдағыштарының осындай ұзақ даму жолымен танысты. Экспозицияда патефон күйтабақтары, винил және иілгіш күйтабақтар, магниттік катушкалар (бобиналар), аудиокассеталар, дискеталар, CD-дискілер, флеш-жадылар және бүгінгі таңда мыңдаған аудиожазбаны бұлтты технологиялар арқылы сақтай алатын смартфон ұсынылды.
Бұл тасымалдағыштардың әрқайсысы – тек техникалық жаңалық қана емес, тұтас бір дәуірдің куәсі. Біреулер үшін олар өткен күндердің жылы естелігін жаңғыртса, енді біреулер үшін бұрын-соңды көрмеген тың жаңалық болды.
Көрмеден естелікке қалған әсерлі сәттермен бөлісіп, уақыт пен дыбыс әлеміне жасаған осы танымдық сапарды бізбен бірге бөліскен барша қонақтарға шынайы алғысымызды білдіреміз.