«Торайғыров университеті» КЕАҚ жоғары колледжінің акт залында «Музыка және тілдер әлемі» атты көшпелі іс-шара өтті. Кездесу Қазақстан халқы тілдері күні мерекесінің тарихы туралы әңгімеден басталды. Сонымен қатар қазақ тілінің дамуына ғалым Ахмет Байтұрсынұлының қосқан үлесіне ерекше назар аударылды. Қазақстанның тілдері мен мәдениеттерінің алуан түрлілігі – еліміздің бай мұрасының маңызды бөлігі. Осы тақырып музейдің музыкалық коллекциясымен танысуға өзіндік көпір болды. Студенттер музей қорындағы патефон және винил пластинкаларының бай топтамасымен танысты. Олардың ішінде әлем халықтарының әндері мен музыкалық шығармалары сақталған.
Ерекше қызығушылық тудырған сәттердің бірі – нағыз патефоннан музыка тыңдау мүмкіндігі болды. 1956 жылы шығарылған шеллак күйтабақтан еврей халық әні «Шпилт клезморим» («Ойнаңдар, музыканттар») Сиди Тальдың (Сореле Биркенталь) орындауында шырқалды. Сиди Таль – идиш тіліндегі әндерді орындауымен танылған белгілі еврей актрисасы әрі әншісі.
Музыка да, тіл де адамдарды біріктіріп, түрлі халықтардың мәдениетін тереңірек түсінуге мүмкіндік береді.